يامتّبع ديني وخــايف أهاليــه
مجبور تكفربي وانا فيك آمنت
معذور لو قلبي ولاعذر يكفيه
يمكن تذكرني ويمكن (ولاكنت)
شد الرحيل ولا تنـــاظر مراسيه
لاانا مثل ماانا ولاانته مثل م انت
لايشغله بالك خفـــوقي تحاتيه
باكر يطيب وان مضى باكري هنت
عودته بدمع المفارق أواسيه
يفضى المكان إلي تمكنت واسكنت
ياويل حالي وش بقى عاد واعطيه
مر العمر وإلي بقى (عنه هونت)
عقدين والثالث مشارف نواهيه
(لازنت بفراقي ولا بالوصل زنت)
روحت والخاطر بقى فيه ما فيه
مسموح يامن في عذابي تفننت
بالهون ياذكرى أماكن ملاقيه
بالهون ياوقت المواعيد لاهنت
لاتزحمه قلبي بذكــــــــراك يكفيه
ما ناسي الساعة ولا الثانية خنت
باكر طويـــــــــل ولي تبي فيه سويه
قلّب لي الماضي ولي فالحشا صنت
هذا صباحه!! كيف ليله بقاويه؟؟
وانا بردى حظي تأكدت وايقنت
بخفيه حبك وان بدى شي يطريه
باقول: لا آنا ولاانته مثل م انت.
